اللهجة السورية المتحدث بها اليوم مليئة بالكلمات السريانية و غيرها من اللغات الآرامية تعرفوا على بعضها….

23

  1. حركش/ اتحركش – ܚܪܟܫ/ܐܬܚܪܟܫ :

كلمة سريانية بتعني “تملق” : رفيقي اتحركش فيي حتى حاكيه بعد ما كنت مزاعلو = رفيقي تملقني…

  1. سفق – ܣܦܩ :

بتعني “أفرغ و أنهى” مثلاً منقول كنت جوعان و سفقت صحنين رز و هلا ريجيمي عم يبكي بالزاوية 🌚 = أنهيت الصحنين أو أفرغت محتواهن

  1. بعق – ܒܥܩ :

و بتعني “صرخ” و منقول بالعامية ابعقلو صوت بيسمعك = اصرخلو صوت بيسمعك

  1. شلح – ܫܠܚ :

كلمة سرياني بتعني “نزع ، تعرى ، خلع” متل لما نقول شلح تيابو بعد الشغل و لبس تياب البيت = نزع تيابو و بدلن..

  1. نفد بريشو – ܢܦܕ ܒܪܫܗ :

هاد تعبير شائع و الكلمتين سريانيات ، الفعل نفد سرياني و بيعني نفذ أو فرّ بالعربي (أما الفعل العربي نفد بيعني انتهى أو فَنيَ) أما الريش هون ما بيعني ريش الطائر لأن البشر ما عندن ريش إنما هو كلمة سريانية بتعني “رأس” ܪܝܫܐ و بالتالي بصير المعنى نفذ أو فر برأسه كناية عن النجاة من مصيبة

  1. سطر – ܣܛܪ :

كلمة سريانية بتعني “صفع” متل لما نقول “سطرني كف” بمعنى صفعني

  1. شحوار – ܫܚܘܪܐ و مشتقاتا متل “شحاري” :

و بتعني سواد الفحم أو الفحم بذاتو و معناها واضح منستخدمو بعاميتنا كتير “شحوار الصوبيا” و لما نقول “شحاري” فهي طريقة للندب للدلالة على سواد الحظ و شؤمو ، و الطائر الشحرور هو الأسود

  1. فلع – ܦܠܥ :

كلمة سريانية بتعني “خلع ، نزع ، طرح أرضاً” متل لما نقول انفلع جسمي عالشغل بمعنى انخلعت أو انطرحت/انهد حيلي

  1. برا – ܒܪܐ :

كلمة سرياني بتعني “الخارج” مثلاً طلاع لبرا = اذهب للخارج
و مشتقنا “براني”

  1. جوا – ܓܘܐ :

كلمة سريانية بتعني “الداخل” مثلاً أنا جوا البيت = أنا داخل البيت

  1. فشخ – ܦܫܟ و مشتقاتها متل “فشخة” :

و بتعني فرج بين رجليه و الفشخة هي مقدار البعد بهالحركة و كمان إلها معنى مسافة البعد بين أصابع الايد

  1. ببو – ܒܒܐ :

و بتعني طفل رضيع

  1. بحش – ܒܚܫ :

أحياناً منقولا بهالصيغة (بحش أو بحّش المشددة) أو بصيغة “بحبش” و بتعني بحث و نبش مثلاً : عم يبحّش بغراضو عن المفتاح أو بحشت بكل تيابي ما لقيت الورقة يعني نبشت فيهن

  1. قرط – ܩܪܛ :

معناها “قضم” مثلاً قرطت شفتي أنا و عم إحكي يعني قضمتا

  1. الزفر – ܙܦܪܐ :

و هي رائحة و طعمة الأكل الشحومي متل اللحمة أو الحليب و مشتقاتو و غيرن…

  1. فرط – ܦܪܛ :

بمعنى قسم ، بدد ، فرق مثلاً فرطت القعدة يعني تبددت ، المصاري الفراطة هي عملة التجزئة ، فرط الخرز يعني فرقو و صراحة الكلمة شوي صعب نلاقيلا مرادف بالعربي 100%

  1. سخلة – ܣܟܠܐ :

منقول بالعامية طولو طول النخلة و عقلو عقل السخلة و كتار بيختلفو شو المعنى البعض بقول معزة البعض بقول مدري شو بينما بالواقع هي كلمة سريانية بتعني غبي أو أحمق

  1. إي – ܐܝܢ :

هي الكلمة البسيطة بس اللي منستخدما كتير و بتعني “نعم” هي سريانية و بتنلفظ بالريانية الفصحى “إين” بإضافة نون بس بآراميات تانية متل الطورانية بتنلفظ “إي” متل العامية تماماً

  1. بس – ܒܣ :

هي الكلمة مو من الآرامية السريانية ، هي من الآراميات الغربية متل آرامية معلولا لهيك ما رح تلاقوها بالمعاجم السريانية بس بتشوفوها بآرامية معلولا و بالمصادر الكتابية إلها (متل الصلاة الربية بالآرامية المعلولية) و بتعني “لكن”

  1. زرب – ܙܪܒ :

بتعني “حصر و سد و ضغط” مثلاً منقول “انزربت بالزاوية” يعني انحصرت فيها و كمان “الزريبة” هي المكان الضيق المحصور [الكلمة موجودة بالعربية بمعنى حظيرة أغنام فقط و ما إلها المعنى المستخدم بعاميتنا]

اترك رد

لن يتم نشر عنوان بريدك الإلكتروني.